ఒక రాజకీయ ఆలోచన

ఒక రాజకీయ పక్షం (అదే పొలిటికల్ పార్టీ) స్థాపిద్దామనుకుంటున్నాను. ఒక వినూత్నమైన పద్దతిలో. అంటే ఈ రాజకీయ పక్షానికి కార్యకర్తలు వగైరా ఎవరూ ఉండరు. ఒక కార్యవర్గమో, సలహా మండలో అలాంటిదేదో ఒకటుంటుంది. అది ఒక ప్రణాళికో, హామీపత్రమో విడుదల చేస్తుంది. ఈ రాజకీయ పక్షానికి ఎటువంటి సిద్ధాంతాలు రాద్ధాంతాలు ఉండవు, ఒకటే సిద్ధాంతం, ఎలాగైనా సరే అధికారంలో ఉండాలి.

అయితే మన వ్యూహం ఏమిటి? ఇదే ప్రత్యేకం. ఎన్నికల్లో పోటీ చెయ్యం. బాగా డబ్బులున్న పారిశ్రామికవేత్తలతో ఒప్పందాలు చేసుకుని లేదా ప్రజల వద్దనుండి పెట్టుబడి రూపంలో తీసుకుని ఆ ధనంతో గెలిచిన అభ్యర్థులను అంటే మన సిద్ధాంతానికి అనుగుణంగా ఉండేవాళ్ళను చేర్చుకుని అధికారానికి కావలసినంత మంది చేరిన తరువాత ప్రభుత్వాన్ని ఏర్పాటు చెయ్యడానికి సిద్ధమని తెలియపరుస్తాం.

ఒక సారి అధికారం వచ్చాక ఎవరిని మంత్రులను చెయ్యాలో కొద్దిగా ఆలోచించాలి. ఒకవేళ పారిశ్రామికవేత్తల మద్దతుతో ధనాన్ని కూడగడితే ఆయా పారిశ్రామికవేత్తల సలహాతో ఆయా మత్రులకు ఆయా శాఖలు కేటాయించడం జరుగుతుంది. లేదా ప్రజల పెట్టుబడితో ధనాన్ని పోగుచేస్తే, ఎవరు ఎక్కువ ధన సంపాదన చేయగలరో చూసి వాళ్ళని మంత్రిత్వ శాఖలకు కేటాయించడం జరుగుతుంది. ఎందుకంటే, పెట్టుబడి పెట్టిన ప్రజలకు మనం లాభాల రూపంలో చూపించి లాభాల్లో కొంత వాటా వాళ్ళకి పంచాలి కదా.

ఒకసారి అధికారంలోకి వచ్చాక మళ్ళీ అధికారాన్ని కోల్పోయే సమస్యే లేదు. ఎందుకంటే ఎవరు ఎక్కడ ఎలా గెలిచినా మనం వాళ్ళని మన పక్షంలో చేర్చుకుంటాం కదా. మళ్ళీ మన పక్షానికే అధికారం :) 

 ఎలా ఉంది ఈ ఆలోచన :-)

 ~సూర్యుడు 🙏